Асіповічы: коратка аб розным

115 новых сем’яў з’явілася сёлета ў Асіповічах у студзені-чэрвені.

47 хлопчыкаў і 54 дзяўчынкI нарадзіліся ў акушэрска-гінекалагічным аддзяленні цэнтральнай раённай бальніцы з пачатку года. Пераважная большасць з іх — 71 — маленькія жыхары райцэнтра. Найбольшая колькасць родаў адбылася ў апошнія тры месяцы — па 20 у кожным.

Новая вэб-старонка “Вайна. Памяць. Пошук” нядаўна з’явілася на сайце цэнтралізаванай бібліятэчнай сеткі раёна. Тут адлюстроўваецца работа аднайменнага пошукава-даследчага краязнаўчага цэнтра. Гэта мегапраект, які аб’ядноўвае 8 інавацыйных праектаў, звязаных між сабою адзінствам мэт і задач. Упершыню сабраны матэрыялы аб загінуўшых воінах-земляках, якія былі ўдастоены ўзнагарод у гады Вялікай Айчыннай вайны. Збіраюцца звесткі аб тых, хто пакуль не быў унесены ў кнігу “Памяць” Асіповіччыны.

Да 145-годдзя райцэнтра ДДЛГУ  «Асіповіцкі доследны лясгас» абнавіў малыя архітэктурныя формы, абсталяваў пляцоўку для адпачынку працаўнікоў на сваёй тэрыторыі. Значную ўвагу надзялілі і клумбам, якія размешчаны каля будынка лясгаса.

12395 квадратных метраў агульнай плошчы жылля ўведзена ў эксплуатацыю за студзень-май у Асіповічах. Гэта ў 7,2 раза больш, чым у адпаведным леташнім перыядзе.

Сёлетняе новаўвядзенне аўтапарка-19 — маршрут Асіповічы-Магілёў — аказалася ў значнай ступені запатрабаваным. Калі ў красавіку мікрааўтобус рабіў рэйс толькі па панядзелках, то на сёння аўтатранспарт арганізацыі накіроўваецца ў абласны цэнтр ва ўсе рабочыя дні тыдня.

“З Днём нараджэння, родны горад!” — наклейкі з такім надпісам упрыгожваюць зараз усе ўпакаваныя вырабы ААТ “Асіповіцкі хлебазавод”. Прадпрыемства рыхтуе ў гэтыя дні нямала пачастункаў для землякоў і нашых гасцей: торты, пірожныя, круасаны, кексы, рулеты ды іншае. Непасрэдна да свята плануецца прыгатаваць тону квасу.