Нядзеля стала асноўным днём галасавання на выбарах Палаты прадстаўнікоў Нацыянальнага сходу Рэспублікі Беларусь шостага склікання. Сёлета выбары праходзілі па новых правілах — у адзін тур: пераможцу дастаткова было набраць простую большасць галасоў. Амаль 500 кандыдатаў прэтэндавалі на 110 дэпутацкіх месцаў і, як адзначыла на прэс-канферэнцыі пасля закрыцця выбарчых участкаў старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына, парламенцкія выбары адбыліся ва ўсіх выбарчых акругах. Па даных, размешчаных на сайце Цэнтрвыбаркама, яўка выбар-шчыкаў склала 74,32%. У Брэсцкай вобласці прагаласавала 77,53% людзей ад агульнай колькасці ўключаных у спісы, у Віцебскай — 79,98, Гомельскай — 75,14, Гродзенскай — 76,19, Мінскай — 75,35, Магілёўскай — 80,9, у сталіцы — 61,11 ад агульнага спісачнага складу, на ўчастках, сфарміраваных за межамі Беларусі, — 66,12%.
Як выглядаюць лічбы па Асіповіцкай выбарчай акрузе № 89? Мясцовыя журналісты пастараліся 11 верасня па максімуму даносіць землякам свежую інфармацыю аб ходзе галасавання, аператыўна размяшчаючы яе разам з фотаздымкамі на сайце “раёнкі” (gzt-akray.by). Па папярэдніх даных, атрыманых у акруговай выбарчай камісіі, удзел у галасаванні прыняло 84,68% выбаршчыкаў, у тым ліку па Глускім раёне — 95,79, па Клічаўскім — 91,5, па нашым — 79,83%.
Высокую ацэнку далі арганізацыі выбараў на Асіповіччыне міжнародныя назіральнікі ад Міжпарламенцкай асамблеі дзяржаў-удзельніц СНД (МПА СНД) Юрый Андрэеў і Міхаіл Шчацінін, якія наведалі некалькі выбарчых участкаў у раёне.
— Варта адзначыць добрую падрыхтаванасць членаў камісій і саміх участкаў — усё абсталявана найлепшым чынам. Ніякіх парушэнняў выбарчага заканадаўства не зафіксавана, усё праходзіць у адпаведнасці з патрабаваннямі. Нельга не заўважыць, што і настрой у людзей, якія ідуць на выбары, выдатны. Адчуваецца, што гэта сапраўды важная падзея ў жыцці грамадзян Беларусі, — падзяліўся член Савета Федэрацыі Федэральнага сходу Расійскай Федэрацыі Міхаіл Шчацінін. — Дарэчы, функцыю міжнароднага назіральніка выконваю ўпершыню, а вось у Беларусі па працоўных справах бываў не раз і раней. З задавальненнем магу адзначыць, што за апошнія гады тут адбылося нямала станоўчых змяненняў як у Мінску, дзе з’явілася больш аб’ектаў сацыяльнага прызначэння, так і ў рэгіёнах. Прыемна ехаць па добрых дарогах, бачыць дагледжаныя палі і населеныя пункты, увогуле парадак навокал. Словам, уражанні ад наведвання Беларусі толькі станоўчыя.
Председатель Осиповичского районного Совета депутатов Александр Пузик, заместитель председателя Постоянной комиссии Палаты представителей Национального собрания Республики Беларусь по здравоохранению, физической культуре, семейной и молодежной политике Елена Шамаль с наблюдателями от Межпарламентской ассамблеи государств-участников СНГ (МПА СНГ) Михаилом Щетининым и Юрием Андреевым во время посещения Строительного участка для голосования №50.
Як падкрэсліў у дзень выбараў Прэзідэнт Беларусі Аляксандр Лукашэнка, дэпутаты не павінны забываць аб сваіх абяцаннях і абавязацельствах: «Iмкненне ва ўладу — гэта нармальныя амбіцыі нармальных людзей. Але, каб яно не засталося банальным, трэба разумець, што, трапіўшы ў гэту ўладу ў якасці, дапусцім, дэпутата, табе ўсё роўна давядзецца выконваць вельмі цяжкія рэчы: займацца заканатворчасцю і выконваць абяцанае, рабіць карыснае для дзяржавы і народа». Пры гэтым Кіраўнік дзяржавы адзначыў, што работа людзей, якія знаходзяцца ва ўладзе, павінна даваць аддачу. «У адваротным выпадку — як ты туды трапіў, так ты адтуль і вылеціш, калі не будзеш выконваць свае абавязацельствы і прыносіць карысць народу», — падкрэсліў Прэзідэнт.
Прозвішчы кандыдатаў, якія, па папярэдніх даных, абраны ў склад Палаты прадстаўнікоў, Цэнтрвыбаркамам на сваім афіцыйным сайце ўжо размешчаны — прадстаўляць наш рэгіён у парламенце выбаршчыкі даверылі Аляксандру Віктаравічу Багдановічу. Поспехаў!
Александр Богданович