Год культуры. Менавіта нацыянальная культура стала крыніцай натхнення для народных і ўзорных калектываў мастацкай самадзейнасці Асіповіччыны. Яны не толькі адраджаюць песенна-танцавальныя традыцыі продкаў, але і фарміруюць у землякоў любоў да нашага, беларускага.
Журналісты “АК” пастаянна сочаць за творчасцю кожнага з фальклорных гуртоў. У рэдакцыі назапашаны немалы архіў фатаграфій, таму сёлетні беларускі народны каляндар і ілюструем здымкамі яскравых момантаў бурлівага жыцця самадзейных артыстаў нашага краю.
Узорны ансамбль старажытнага фальклору і музыкі “Васілінкі” Асіповіцкай школы мастацтваў № 2. Званне ўзорнага з 2005 года.
Студзень. 24. Аксіння. «Аксіння дарогу перамяце, а корм падмяце». Фядос. «На Фядоса цёпла». 25. Таццяна. Свята студэнтаў. Павел. 31. Апанас. Гусінае свята. Свята свойскай жывёлы. «Хавай нос у апанасаўскі мароз».
Народны ансамбль народнай песні “Вечарынка” Ялізаўскага Дома культуры.
Званне народнага з 1995 года.
Люты. 2. Грамніцы, Стрэчанне. «Калі на Грамніцы нап’ецца певень вадзіцы, то на Юр’я наесца вол травіцы», «Грамніца — хлебу палавіца». 5. Агата. «Хлеб і соль святой Агаты не пусціць бяды да хаты». 6. Аксіння-паўзімніца. «На Аксінню мяце». Дарота. «Па Дароце высахнуць хусты на плоце». 14. Трыфан. «На Трыфана зорна — вясна позняя». Валянцін. Свята закаханых. 18. Агата. Каровіна свята. 24. Улассе. Свята жывёлы. «Аўлас на сыры лас». Мацей. «На Мацея адліга — будзе мароз».
Народны ансамбль народнай песні “Вязанка” Вяззеўскага сельскага Дома культуры. Званне народнага з 2000 года.
Сакавік. 6. Сырапусны тыдзень. Тыдзень перад Масленіцай. Дзяўчаты вешалі «калодкі» нежанатым хлопцам. 13. Масленіца. «Масленіца ў «вятху» (пасля поўні) — дзяржы пшаніцу ў мяху, сей пшаніцу на ўсю руку». Гуканне вясны. «Блаславі, Божа, зіму замыкаці, вясну загукаці». 22. Саракі. Свята птушак. Прылятае 40 выраяў. «Святыя Саракі ў поле саху валаклі». Прыска. «На Святога Прыску праб’е лёд і пліска». 27. ВЯЛІКДЗЕНЬ (у каталікоў). Арына. «На Арыну сей капусту ў расадніках».
Народны ансамбль народнай песні “Вяселле” Каўгарскага сельскага клуба. Званне народнага з 1989 года.
Красавік. 1. Дар’я Вясенняя. 7. Дабравешчанне. «Дабравешчанне без ластавак — халоднае лета». 9. Матрона. «На Матрону шчупак хвастом лёд разбівае». 21. Руф. «Руф рушыць снягі». 24. Вербніца. Анціп — ахоўнік зубоў.
Народны ансамбль народнай песні і музыкі “Дзівакі” раённага Цэнтра культуры. Званне народнага з 2002 года.
Май. 1. ВЯЛІКДЗЕНЬ (у праваслаўных). «Хрыстос уваскрэс! — Сапраўды ўваскрэс!». Кузьма. «Май Кузьма з морквінай сустракае, а Пахом з гурком». 6. Юр’е. Свята жывёлы. «Як дождж на Юр’я — хлеб будзе і ў дурня». Абрад «Страла». 8. Праводная нядзеля. «Ідзі, зіма, да Кучава, як ты нам надакучыла». 10. Радаўніца. 21. Іван Веснавы — апякун земляроба. «На Івана каласок, а на Пятра піражок».
Народны вакальны ансамбль «Журавушка» Сасноўскага сельскага клуба. Званне народнага з 2003 года.
Чэрвень. 4. Васіліск. «Ад Васіліска і салавей блізка». 5. Дзень Ефрасінні Полацкай. Хадзілі пакланіцца і абракацца. 9. Ушэсце. 19. Сёмуха, Тройца. Культ продкаў і расліннасці. 27. Пятроўка да 11 ліпеня. Пятроўскі пост. Пятроўка-галадоўка.
Узорны харэаграфічны ансамбль “Крынічка” Асіповіцкай школы мастацтваў № 1. Званне ўзорнага з 2002 года.
Ліпень. 6. Купалле. Свята Сонца і кахання. «Дзень — адбаўленне, ночы прыбаўленне». 10. Самсон. «На Самсона дождж — сем тыдняў то ж». Сем братоў. «Сем братоў варожаць, колькі тыдняў пагоды». 12. Пятро. Свята заканчэння Купалля. 21. Казанская. Пракоп. «Пракоп бок прыпёк». Данат. «Святы Данат коскі точыць».
Народны фолк-мадэрн калектыў “Куццякі” Дома культуры Асіповічы Магілёўскага культурна-спартыўнага цэнтра. Званне народнага з 2003 года.
Жнівень. 6. Барыс. «Барыс і Глеб — паспеў хлеб». 7. Ганны. «Святыя Ганны бабкі стаўляюць». 14. Макавей, Першы Спас. Свята маку і мёду. Спасаўка. Пост да 28 жніўня. 19. Яблычны Спас. Свята садавіны. 28. Прачыстая. Свята ўраджаю. 29. Трэці Спас. Свята хлеба. Ян. «Ян на лета прыйшоў, а ўжо восень знайшоў».
Народны ансамбль народнай песні і музыкі “Люлечка” раённага Цэнтра культуры. Званне народнага з 1991 года.
Верасень. 5. Лупа. «Сей на Лупа — будзе жыта купа». 7. Баўтрамей. «Жыта на зіму сей». 8. Другая Прачыстая. «Меншая Прачыста — канчай сеяць начыста». 26. Стаўроўскія Дзяды.
Народны эстрадны ансамбль “Парадзiз” Ліпенскага сельскага Дома культуры. Званне народнага з 2003 года.
Кастрычнік. 14. Пакровы, Трэцяя Прачыстая. Вясельная пара. «Свята Пакрова, пакрый зямельку лісточкам, а галоўку — вяночкам». «Пакровы — зарыкалі каровы». Дзявоцкае лета (па 21.10). Прымалі «ў дзеўкі» сябровак. 25. Марцін. Свята млынароў.
Народны ансамбль народнай песні “Сваякі” Карытнянскага сельскага Дома культуры. Званне народнага з 2002 года.
Лістапад. 4. Казанская. Дождж ці снег. 5. Асяніны, Змітраўскія Дзяды. «Святыя дзяды, завём вас…». 8. Зміцер. «Да Змітра дзеўка хітра». Канец надзеі выйсці замуж у гэтым годзе. 12. Артошка. Пачатак прадзення. 14. Кузьма-Дзям’ян — апякун земляробства, кавалёў і вяселля. 21. Міхайлаў дзень — абаронца ад грому. Мядзведзі ідуць у спячку. 27. Юстыніян — апякун плоднасці і дзяцінства. Адвент. Перадкалядны пост. Піліп. Пярэдадзень Піліпаўскага посту (да 7 студзеня).
Народны ансамбль народнай песні і музыкі “Сузор’е” Пратасевіцкага сельскага Дома культуры. Званне народнага з 2002 года.
Снежань. 4. Увядзенне. Водзяцца ваўкі. Барбара. «Барбара ноч урвала, а дзень надтачыла». 9. Юр’е Зімовы. «Юра мосціць». Ганны. «Ад Ганны да Каляд два тыдні і два дні». 13. Андросы, Андрэйкі. Варажылі. 17. Варвары. «Мікола і Варвара ноч урвалі». 19. Мікола Зімовы. «Без Міколы не бывае ні зіма, ні лета». «Мікола марозам гвоздзіць». 22. Ганны. «Ганкі — сядайце на санкі».