Самы значны тэмп росту вытворчасці за апошнія гады ў гаспадарцы адзначаны ў 2016-м: 128,8%.
Самая высокая ўраджайнасць збожжа і зернебабовых культур сярод сельгаспрадпрыемстваў раёна дасягнута ў філіяле летась — 44,9 цэнтнера з гектара. У разрэзе культур здабытак выглядаў так: пшаніцы намалочана 904 тоны, ячменю — 1340, жыта — 645, аўса — 216, проса — 57, трыцікале — 954, зернебабовых — 283, кукурузы — 1567. Агульны вал склаў 158,6% да пазалеташняга.
Самыя вялікія запасы кармоў нарыхтаваны таксама тут: калектыў забяспечыў вытворчасць травяных кармоў 69,9 кармавых адзінак з бала-гектара сельгасугоддзяў, або 37,4 цэнтнера кармавых адзінак на ўмоўную галаву — 209,7% да папярэдняга аналагічнага паказчыка.
Самая высокая прадукцыйнасць статка ў 2016 годзе адзначана на МТФ у Ліпені, дзе атрымалі 7592 кілаграмы малака ад каровы, Свіслачы — 7227, Вязаўніцы — 7053. Сярэднегадавы ўдой ад каровы па гаспадарцы — 6328 кг.
Самае якаснае малако дае МТФ № 7: гатункам “экстра” здадзена 98,7%.
Самыя высокія надоі атрымалі аператары машыннага даення Аляксей Біцюн — 8701 кг, Наталля Грышановіч — 8534, Сняжана Жуковіч — 7926, Алена Рыжковіч — 7394.
Самыя высокія прывагі жывёлы забяспечылі жывёлаводы Павел Лень — у сярэднім цялушкі прыбаўлялі па 968 грамаў, і Уладзімір Койпіш — 969 г.
Самая новая тэхніка ў гаспадарцы — высокапрадукцыйныя кормаўборачныя комплексы КВК 8060 і КВК 800, два энерганасычаныя трактары МТЗ-3022, апырсквальнікі ОПШТН-2500.
Самую вялікую колькасць вёсак аб’ядноўвае “Белшына-агра”: 19 населеных пунктаў, агульная колькасць жыхароў у якіх 2831 чалавек.
Сама больш “белшынаўцаў” пражывае ў Вязаўніцы, Ліпені і Свіслачы.
Самую высокую заработную плату сярод сельгаспрадпрыемстваў раёна маюць працаўнікі філіяла — 628,8 рубля, што на 115,5% больш, чым у папярэднім перыядзе.
Аляксандр Баброў, дырэктар прадпрыемства:
— Самае важнае ў планах гаспадаркі сёлета — атрымаць ад каровы 6800 кілаграмаў малака. Для гэтага ўсім прыйдзецца пастарацца, аднак такі паказчык лічу рэальным. Сур’ёзнае змяненне чакаецца ў карце палёў: плануем 300 гектараў аддаць пад цукровыя буракі, тады як летась гэту культуру не сеялі. Збіраемся пабудаваць на ферме ў Ліпені 2 арачнікі для вырошчвання маладняку, што дазволіць мець больш высокія прывагі на цялушках, у 15-16 месяцаў іх пакрываць і вырасціць кароў з сярэднясутачным удоем 25 кілаграмаў. У сакавіку запусцім трэці кароўнік на МТФ № 7 у Вязычыне. У перспектыве збіраемся мадэрнізаваць два кароўнікі ў Вязаўніцы, дзе будзе прывязнае ўтрыманне жывёлы, а новая тэхналогія даення дазволіць аднаму аператару абслугоўваць сотню кароў.
Валянцін Шкурын, галоўны аграном гаспадаркі:
— Самы галоўны фактар, які гарантуе добры ўраджай, — дасканалае выкананне тэхналогій. Важна ўсё: якасна апрацаваць поле, заправіць яго, своечасова правесці сяўбу, даглядаць культуру і, калі прыйдзе час, убраць. Немалая роля належыць і кліматычным умовам. Спадзяёмся сёлета таксама атрымаць добры ўраджай. Апошні аб’езд азімых, які рабілі днямі, паказаў, што зімоўка культур прайшла нядрэнна.
Наталля Грышановіч, аператар машыннага даення МТФ “Ліпень”:
Самае асноўнае на няпростым шляху да вялікага малака — умовы, у якіх працуеш. У нас на ферме дружны і мэтанакіраваны калектыў. Прысутнічае і спаборніцтва, але яно заснавана не на зайздрасці, а на радасці за поспехі свае і паплечнікаў. Мы адна каманда! Мае значэнне і якасная работа ветэрынарнай і заатэхнічнай службаў, тэхніка—асемянатара. Калі кожны добрасумленна выконвае свае абавязкі, тады ўсё атрымліваецца.
Загрузка ...
