Асіповічы: хроніка здарэнняў

РАУС

Раніцай 2 сакавіка жыхар Дрычына ў стане алкагольнага ап’янення на глебе ўзнікшых непрыязных адносін наўмысна нанёс рукамі 5 удараў у галаву гаспадару дома, з якім сумесна распівалі спіртныя напоі. Прычыненыя цялесныя пашко-джанні аказаліся смяротнымі. Па факце ўзбуджана крымінальная справа.

Увечары 6 сакавіка ці ранкам наступнага дня хтосьці сарваў навясныя замкі і пранік у гаражы ГБК “Гарадок” в. Лапічы, адкуль былі ўкрадзены гідраўлічная вадкасць і дызельнае паліва (больш за тону) на суму 12.748.000 рублёў, аўтамагнітола коштам 1.000.000 рублёў, DVD-прайгравальнік, відэарэгістратар і навігатар на агульную суму 3.500.000 рублёў.

У ходзе аглядаў жылля некаторых грамадзян выяўлена і канфіскавана 380 літраў брагі.

РАСК

У перыяд з 3 па 9 сакавіка ўзбуджана 9 крымінальных спраў, з якіх 7 — за крадзеж, па 1 — за ўпраўленне транспартным сродкам без права кіравання і прычыненне цяжкіх цялесных пашко-джанняў.

4 сакавіка ўзбуджана крымінальная справа ў адносінах гр. М.: 13 лютага жанчына ў магазіне “Дабраном” украла ў пакупніцы кашалёк амаль з чатырма сотнямі рублёў.

Злодзею, які пранік на дачны ўчастак на ст. Верайцы, даспадобы прыйшліся металічныя арэлі, якія былі пакінуты на зіму ў лазні. Схованка аказалася ненадзейнай…

ДАI

Спынена 130 парушэнняў правілаў руху, прыцягнута да адказнасці 15 вадзіцеляў за перавышэнне хуткасці, 2 — за кіраванне транспартам у стане алкагольнага ап’янення, 10 пешаходаў без святлоадбіваючых элементаў. Адбылося 3 ДТЗ з матэрыяльным уронам.

На тэрыторыі раёна да 18 сакавіка праводзіцца спецыяльная аперацыя “Пешаход”, асноўная мэта якой — прафілактыка ДТЗ з неабароненымі ўдзельнікамі дарожнага руху. АДАI папярэджвае: за парушэнне правілаў дарожнага руху накладваецца штраф у памеры ад 1 да 3 базавых велічынь, калі парушальнік у стане алкагольнага ап’янення — ад 3 да 5.

АУСТ

Узбуджана 2 крымінальныя справы: за незаконны абарот наркатычных сродкаў і службовы падлог. Складзена 60 адміністрацыйных пратаколаў, суправоджана 93 цягнікі, з якіх ссаджана 12 правапарушальнікаў. Затрыманы 2 злачынцы, якія раней знаходзіліся ў вышуку.

Дэпартамент аховы

Спынена 10 правапарушэнняў, з якіх 2 — дробныя крадзяжы, 1 — хуліганства, парушэнняў антыалкагольнага заканадаўства — 4, правілаў дарожнага руху — 3.

Спецізалятар

Дастаўлена 40 грамадзян, 34 пакінута для працверажэння. Традыцыйна самымі “вясёлымі” днямі сталі 8 і 9 сакавіка: медвыцвярэзнік часова прыняў 9 і 8 чалавек адпаведна. Дарэчы, у святкаванні Дня жанчын вызначыліся менавіта мужчыны. За мінулы тыдзень у спецізалятар патрапіла адна жанчына.

IАЖіРС

Выяўлена парушэнне правілаў вядзення паляўнічай гаспадаркі і палявання: незаконная здабыча дзіка. Нанесены ўрон ацэньваецца ў 60 базавых велічынь.