Са шчырымі словамі віншавання і ўдзячнасці людзям, якія ў розныя часы абаранялі родны край ад фашысцкай навалы, аднаўлялі і адбудоўвалі гарады і вёскі пасля ваеннай разрухі, а таксама сённяшнім працаўнікам звярнуўся да прысутных у зале кіраўнік Адміністрацыі Прэзідэнта Рэспублікі Беларусь Ігар Сяргеенка. Ва ўрачыстай абстаноўцы Ігар Пятровіч агучыў прывітальны адрас Кіраўніка дзяржавы і ўручыў яго старшыні аблвыканкама Анатолю Ісачанку.
Падчас урачыстасці на сцэну выклікаліся лепшыя з лепшых працаўнікоў Прыдняпроўскага краю. Ганаровыя граматы, падзякі кіраўніка Адміністрацыі Прэзідэнта атрымалі прадстаўнікі розных сфер па выніках работы за 2022 год. Ганаровага звання “Чалавек года Магілёўшчыны” ўдастоены 15 жыхароў рэгіёна.
Не раз падчас выступлення ўзгадваліся прадпрыемствы, установы, арганізацыі Асіповіччыны. Нямала землякоў вызначыліся адданай працай, поспехам у многіх галінах народнай гаспадаркі, і сёння многія з’яўляюцца сапраўдным узорам для пераймання. І з гэтым нельга не пагадзіцца.
“Перакананы, што ініцыятыва, асабістая адказнасць, мэтанакіраванасць і надалей будуць дапамагаць нам дасягаць новых перамог дзеля дабрабыту роднага рэгіёна і нашай Беларусі. Бо перад кожным стаіць адна галоўная задача — перадаць наш агульны дом дзецям і ўнукам добранадзейным і стабільным”, — падзяліўся меркаваннем губернатар Анатоль Ісачанка.
Кожны чалавек, чый лёс пэўным чынам звязаны з лёсам Магілёўшчыны, ведае, што не любіць яе нельга, нельга ёю не ганарыцца. Мы шчасліва жывём у мірнай краіне, прыгожым непаўторным краі, маем магчымасць працаваць, а нашы дзеці могуць расці, усебакова развівацца і радавацца жыццю. І неабходна разумець, што сёння надзвычай важна агульнымі намаганнямі зберагчы мірнае неба над галовою. Бо з прыходам вайны губляюцца ўсе чалавечыя каштоўнасці, спакой, дабрабыт, шчасце. Ды і само жыццё становіцца пад пагрозу. А так быць не павінна.
Пасля афіцыйных прамоў, віншаванняў, узнагароджанняў наступае, як правіла, этап артыстычнага мастацтва. Так было і на гэты раз. Загучалі песні, заваражылі гледачоў сваімі яркімі выступленнямі творчыя калектывы вобласці. Прыемна адзначыць, што сярод тых, хто на сцэне ствараў адпаведны настрой, былі і самадзейныя артысты зямлі Асіповіцкай — народны ансамбль “Вязанка” Вяззеўскага СДК.
Тамара Валадзько, старшыня Дараганаўскага сельвыканкама.
