Ведай нашых!
Ёсць кім ганарыцца
Падведзены вынікі абласнога этапу рэспубліканскай алімпіяды школьнікаў па вучэбных прадметах, дзе юныя землякі паказалі добрыя веды.
Дыплома I ступені па тэхнічнай працы ўдастоены вучань 10 класа СШ № 4 Мікіта Куліш, якога падрыхтавала Наталля Пінчук. Таксама па працоўным навучанні трэцяе месца занялі 10-класнікі Вяззеўскай СШ Дар’я Бернат і Аляксей Доўгаль. Іх педагогі — Жанна Місс і Аляксандр Ляўкоў адпаведна.
Яшчэ адной дысцыплінай, якая прынесла шмат узнагарод, стала фізічная культура. Дыплом II ступені па гэтым прадмеце атрымала вучаніца 10 класа гімназіі Наталля Ганчарова, якую падрыхтаваў Васіль Андрыевіч. На трэцім месцы яе аднагодкі гімназістка Валерыя Грыгарчук (настаўнік Анжаліка Бруёк) і вучаніца СШ № 4 Дар’я Паўлоўская (настаўнік Міхаіл Бруёк).
Трэцяе месца па матэматыцы занялі 8-класнікі Ксенія Рашэтнікава (гімназія) і Усевалад Пышны (СШ № 3). Іх педагогі – Святлана Дораш і Ганна Лісіцкая адпаведна. Дыпломы такой жа вартасці прывезлі з абласнога цэнтра вучні СШ № 3 Дар’я Вайцюк (9 клас) і гімназіі Дана Лісічкіна (10 клас), якія пацвердзілі трываласць ведаў па рускай мове, атрыманых з дапамогай настаўнікаў Галіны Вайцюк і Таццяны Амбрушкевіч адпаведна. Узнагародай аналагічнага кшталту па фізіцы адзначаны веды і ўменні 9-класніка СШ № 4 Івана Раманчука (настаўнік Алена Мурашка) і вучня 10 класа гімназіі Рыгора Піцухі, якога падрыхтавала Жанна Молчан.
Заахвочвальныя водгукі па інфарматыцы і рускай мове заслужылі 6-класнік гімназіі Сцяпан Быхаўцоў і вучаніца выпускнога класа Ліпенскага ВПК дзіцячы сад-сярэдняя школа Кацярына Астравух адпаведна. Дарэчы, Сцяпан стаў самым юным алімпіяднікам сярод 28 удзельнікаў з нашага раёна і ўсяго прыдняпроўскага краю.
