Асіповічы: завіруха мяце, завіруха…

0
1

Гэтай зімой снежань не апраўдаў сваю назву: адсутнічала і трывалае покрыва на зямлі, і завеямі месяц не балаваў. А вось студзень з першых дзён вырашыў выправіць гэты хіб, ахінуўшы навакольныя дрэвы ў цёплыя пульхныя ўборы, а кінутыя ў дварах машыны ператварыў у суцэльныя гурбы.

Дзеці радуюцца прыгажосці беласнежнай прасторы, а работнікі камунальных службаў заклапочаны тым, каб своечасова расчышчаць дарогі і тратуары.

sn-028

З серады калектыў УКП ЖКГ працуе ў кругласутачным рэжыме. Задзейнічана 16 адзінак тэхнікі, 80 чалавек — разам з рабочымі па ўборцы тэрыторыі. Нават ноччу 3 транспартныя сродкі чысцяць вясковыя вуліцы, працуе тэхніка і ў горадзе. Снег вывозіцца за межы райцэнтра. Каб не было коўзка, робіцца антыгалалёдная пасыпка. У дзень выкарыстоўваецца каля 45 тон пясчана-салянай сумесі.

sn-001 sn-038 sn-022

На чыгуначным вузле на ўборцы снегу, ачыстцы стрэлачных пераводаў занята больш за 50 чалавек, працуе снегаўборачная машына СМ-2. Рабочыя забяспечаны ўсім неабходным інвентаром. Пакуль спраўляюцца сіламі дыстанцыі пуці, калі ж снегапады ўзмоцняцца — будуць прыцягвацца дадатковыя рэсурсы.

yoyo-051 yoyo-033 yoyo-048

Усё робіцца для таго, каб транспарт і пешаходы не адчувалі нязручнасцей у час руху. I хаця на дарогах, як сведчаць у ДАI, стан даволі складаны, аварый зафіксавана не было.

Пасажырскі аўтатранспарт рухаецца па графіку, толькі на некаторых маршрутах спазненні складаюць 7-10 мінут.

Кожны павінен разумець, што аднамомантна ўбраць такую вялікую колькасць снегу немагчыма, а таму ўзяць у рукі лапату і крыху папрацаваць — толькі ў задавальненне. Праверана на сабе!

Iна ЗАСКЕВIЧ.